दूध आणण्याच्या बहाण्याने शेजारणीला घराबाहेर नेले, घरातील साडेपाच तोळे सोन्याचे दागिने चोरले; करवीर पोलिसांनी काही दिवसांतच उलगडला गुन्हा
कोल्हापूर जिल्ह्यातील नागदेव वाडी (ता. करवीर) येथे घडलेल्या एका धक्कादायक चोरीच्या प्रकाराने परिसरात खळबळ उडाली आहे. वटपौर्णिमेच्या दिवशी शेजारणीचा अंगावरील सोन्याचे दागिने पाहिल्यानंतर एका तरुणीने तिच्याशी मैत्री वाढवली आणि नंतर लिव्ह-इन रिलेशनशिपमध्ये राहणाऱ्या साथीदाराच्या मदतीने चोरीचा कट रचल्याचे तपासात समोर आले आहे.
नेमकं घडलं काय?
कोल्हापूर जिल्ह्यातील नागदेव वाडी (ता. करवीर) येथे ही घटना घडली. वटपौर्णिमेच्या दिवशी एका महिलेने परिधान केलेले सोन्याचे दागिने पाहून शेजारी राहणाऱ्या तेजस्विनी बुरबुसे हिच्या मनात चोरीचा विचार आला. त्यानंतर तिने संबंधित महिलेशी मैत्री वाढवत तिचा विश्वास संपादन केला.
काही दिवसांनी तेजस्विनीने शेजारणीला दूध आणण्यासाठी सोबत येण्यास सांगितले. महिला घराबाहेर गेल्यानंतर तेजस्विनीचा लिव्ह-इन पार्टनर अवधूत धुरे याने संधी साधून घरात प्रवेश केला. घरातील कपाटात ठेवलेले सुमारे साडेपाच तोळे सोन्याचे दागिने चोरून तो पसार झाला.
वटपौर्णिमेच्या दिवशी पडली दागिन्यांवर नजर
मिळालेल्या माहितीनुसार, वटपौर्णिमे निमित्त एका महिलेने सोन्याचे दागिने घालून पूजा केली होती. त्यावेळी शेजारी राहणाऱ्या तेजस्विनी बुरबुसे हिची त्या दागिन्यांवर नजर पडली. दागिन्यांचा मोह झाल्यानंतर तिने संबंधित महिलेशी ओळख वाढवण्यास सुरुवात केली. काही दिवसांत दोघींमध्ये चांगली मैत्री निर्माण झाली.
मैत्रीच्या आडून आखला चोरीचा डाव
शेजारणीचा विश्वास संपादन केल्यानंतर तेजस्विनीने चोरीचा प्लॅन तयार केला. एका दिवशी तिने दूध आणण्यासाठी बाहेर जाण्याचा बहाणा करत शेजारणीला घराबाहेर बोलावले. महिला घराबाहेर गेल्यानंतर तिचा साथीदार अवधूत धुरे घरात शिरला आणि कपाटात ठेवलेले सोन्याचे दागिने घेऊन पसार झाला.
दागिने गायब झाल्याने उडाली खळबळ
महिला घरी परतल्यानंतर कपाटातील दागिने गायब असल्याचे तिच्या लक्षात आले. सुमारे साडेपाच तोळे सोन्याचे दागिने चोरीला गेल्याचे स्पष्ट होताच तिने तात्काळ करवीर पोलिस ठाण्यात तक्रार दाखल केली. या घटनेमुळे परिसरातही एकच चर्चा सुरू झाली.
पोलिसांनी काही दिवसांतच उलगडला गुन्हा
तक्रार मिळाल्यानंतर करवीर पोलिसांनी तपासाची चक्रे वेगाने फिरवली. सीसीटीव्ही फूटेज, तांत्रिक तपास आणि गोपनीय माहितीच्या आधारे पोलिसांनी संशयितांचा माग काढला. तपासादरम्यान अवधूत लहू धुरे (वय 23) आणि तेजस्विनी विक्रम बुरबुसे (वय 24) यांना ताब्यात घेण्यात आले.
आरोपींकडून साडेचार तोळे दागिने जप्त
चौकशीत दोघांची भूमिका स्पष्ट झाल्यानंतर पोलिसांनी त्यांना अटक केली. आरोपींकडून साडेचार तोळे सोन्याचे दागिने हस्तगत करण्यात आले असून उर्वरित मुद्देमालाचा शोध सुरू आहे. या प्रकरणाचा पुढील तपास करवीर पोलीस करत आहेत.
विश्वासघातच्या घटनेने परिसरात संताप
शेजारधर्माच्या नात्याचा गैरफायदा घेत मैत्रीच्या आडून चोरी करण्यात आल्याने नागरिकांमध्ये संताप व्यक्त होत आहे. ओळखीच्या व्यक्तीवरही अति विश्वास ठेवणे किती धोकादायक ठरू शकते, याचे हे ताजे उदाहरण असल्याची चर्चा परिसरात सुरू आहे.
टिप्पणी पोस्ट करा